POESIA PRO SA MORTE DE UNU FRADE
 

Sa primavera bella ecco suprida
sa campagna est allegra et irde
onzi pianta est de nou estida
de colores amenos e brillantes
sa rundinella est de nou arrivida
cantada allegra in s'aria olezzante
però su coro in sas intragias mias
no torra no a s'antiga allegria.

Sa rosa chi apassida in su giardinu
fit tempus chena mirada dae niunu
como totu la ponene in su sinu
la leada la adorada cadaunu
violas margheritas e germinu
mandana ristorante su profumu
onzi cosa mudadu ada su colore
però cun megus fissu est su dolore.

Sas damas de biancu sunu estidas
cuddas dies solennes et de gloria
de profumos soaves arrichidas
si lezzede s'allegria in sas memorias
passizan in piazza totti inidas
discutene et faeddana de istoria
ha!! Deus bonu piango a custa vista
duncas sun tottu allegras et deo trista!!

Primavera pro me ses tottu piantu
onzi fiore annunziada angustia
dies de festa mi ammenta tantu
sa pena et su turmentu chi tenia
sospirende un'avviu a campu santu
et iffundo de lagrimas sa via
inie drommidi frade tantu amadu
visu dulce in sa terra ses cuadu.

Abbrazzo cussa terra tantu cara
inue est interradu cuss'anzone
si vives bene o male mi declara
mi cossumo de pena chin rejone
una rughe su numene mi narada
comente sa mia afflizione
m'as prenu de dolu et de affannos
morrere in sa bella edade de seigh'annos.

A seigh'annos sa fida si finit
o morte istraziante e dolorosa
pianghen tottu a Juannicu Sini
mama fizas agians et isposas
sos amigos suos chin ghirlandas fini
intrecads de lizos e de rosas
haimè!! Cando pesso a tottu custu
fidi s'undighi in su mese de Austu.

Frade istimadu ammentendemi a tie
cando fisi in su lettu addoloradu
tottu affligidu invochende a mie
nende:"Elena so morzende ispasimadu"
cando tramante  e pallidu che nie
m'asa istrintu in su coro e abbrazzadu
poi pronunziende:"sorre mia"
"custa chi ti faeddo est s'urtima ia":

"Non ti faeddo pius" mi naraias
cuddas laras soaves e delicadas
"Elena cara giama a mamma mia"
"mirami chi sa limba  mi est mancada"
e a issu soe accurziada
e poi a boghe muda m'ada nadu
"dami pabilu e tinteri sorre mia"
"pro iscrier su chi narrer ti cheria":

Mi ritiresi a piangher luntanu
su corazu aia perdidu in conclusione
cale coro crudele e inumanu
no pianghet a  tale espressione
si lagrimende su sero su manzanu
no mi culpe nessunu est chin rejone
sempre appo in mente s'urtima mirada
chi pariat nende "Adiu sorre mia":

Mi paret como de d'idere afflizzidu
mirende addolradu cando nesti
"A ite puntu mi so riduidu"
"so siguru chi morzo" ripetesti
ttremante e poi pallidu t'appo idu
sospirende affannadu e ispiresti
mammento cando as nadu tantas bias
"cherzo idere a babbu s'urtima ia":

O perla tantu cara ite dolore
su coro m'as feridu intro su pettus
ses partidu pienu de amore
a tottu ubbidiente e cun rispettu
s'ammirabile visu bellu fiore
s'attraiada s'amore ei su rispettu
sas laras rubicundas et sorridentes
finas a esser cun tegus appo in mente.

Fino custu lamentu sospirende
sienda tantu cara appo perdidu
mi miro a babbu e mamma pianghende
ca a issos pius de tottu ada afflizzidu
sa vida addolorada sun passende
pro s'esser custu fizu dispedidu
pro continu sos coros sun divisos
no sidan pius custos accisos.