SA PRINTZIPESSA E SANT'ANNA

B'aiat una vorta una printzipessa chi viviat felitze in su casteddu.
Su maridu si nariat Ladrunconeddu. Su printzipe it partidu in gherra. A pustiS de un'annu est ghiradu dae sa gherra e at acatadu sa muzere allatanne su pitzinnu. E l'at nadu:
- Izu de chi est?
E sa printzipessa l'at rispostu:
- Est izu tuo.
Ma su printzipe non l'at cretida e chin s'ispada nche l'at secadu una tita, paris chin sa conca de su pitzinnu e nche los at mandados dae su casteddu.
Sa printzipessa pranghiat e precabat. Bagabundanne in sos padentes aiat bidu unu pinnetu. In intro biat una santa chi si naraiat Sant'Anna Manos de oro e sa printzipessa pranghende l'at nadu:
- Cusimi sa conca de izu meu e sa tita chin d unu ilu de oro.
E Sant'Anna Manos de oro l'at atacadu sa conca e sa tita.
Sa printzipessa ringratzianne sa Santa s'est incaminada in su padente.
Caminanne caminanne aiat bidu una domo derruta e si nch'est intrada chin su pitzinnu.
Ch'in colados bator annos e su pitzinnu s'it fatu meda bellu. Una die su printzipe it annadu a catza, ma a pustis de una die de catza, no aiat picadu nudda.
Istracu chi no nne podiat prus, aiat bidu custa domo betza chi isciat su umu dae su umajolu. At tochedadu e l'at apertu sa printzipessa.
Sa printzipessa, canno l'at bidu, l'at conotu deretu, ma at fatu binta de nudda. L'at fatu intrare e l'at dimannadu si it amidu.
At aparitzadu sa mesa e l'at nadu:
- Sedidebos e mannicadebos su b'at.
Su pitzinnu, cada tantu cantabat e naraiat:
- Custu est babu meu ... custu est babu meu.
Su printzipe incuriosidu at dimannadu:
- Chi est custu bellu pitzinnu? - Izu meu,- l'at rispostu.
Sa printzipessa in s'ora chi su printzipe it aeddanne chin su izu, nche l'at postu in sa butzaca una urcheta.
Canno it isparitzanne sa mesa at nadu:
- Comente mai bi mancat un'urcheta?
Su printzipe s'est acatadu male; ma sa printzipessa l'at nadu:
- Pro piaghere, abaidade non bos nche siat ruta a supra.
Su printzipe s'est tocadu e at acatadu sa urcheta in butzaca. S'est iscusadu naranneli chi isce no nn'aiat curpa; chi it innossente.
Ma sa printzipessa l'at nadu:
- Gurpas cantu nne tenes tue, nn'aia jeo de t'aer traitu. Chentza piedade m'as acusadu de infedeltade e aias mortu a izu tuo e secadu una tita, ma Sant'Anna Manos de oro at apidu dolu de s'innossentzia mea e de sa creatura; nos at meraculadu.
Su printzipe s'est ghetadu a sos pedes de sa printzipessa pedinneli perdonu e precannela de lu perdonare e de torrare a su casteddu.
Sa printzipessa l'aiat perdonadu e totus paris si nche sono torrados a su casteddu e sono vividos felitzes e cuntentos.