S'ISTORIA DE SU PRADE E DE SA PERRA DE S'AVA

Una vorta bi aiat unu prade e teniat una perra de ava. Est andatu a umbe una tzia e li at natu:
- Tzia a mi la tentates custa perra de ava?
- Ponitela in cue.
Torrat su prade e li at natu:
- Tzia, ello sa perra de s'ava?
- Oddeu su pra', sa pudda si nche l'at mandicata.
- O mi torrates sa perra de s'ava o mi nche pico sa pudda.
Poi est andatu a umbe un'atera tzia e li at natu:
- Tzia a mi la tentates custa pudda?
- Ponitela in cue a curtzu de sa chisina.
Lompet su porcu e si nche la mandicat.
Torrat su prade e li at natu.
- Tzia, so veitu a mi nche picare sa pudda.
- Oddeu su pra', su porcu si nche l'at mandicata.
- Cara tzia, o mi torrates sa pudda o mi nche pico su porcu.
E si nche l'at picatu.
Poi est andau a umbe un'atera tzia e li at natu:
- Tzia a mi lu tentates custu porcu?
- Eja, ja bos lu tento; ponitelu in cue a curtzu de s'istalla.
Torrat su prade e li nat: - Tzia, ello su porcu?
- Oddeu su pra', unu carche l'at tiratu su caddu e l'at mortu.
- Cara tzia, mi dispiachet: o mi torrates su porcu o mi nche pico su caddu.
E gai at fatu. Picat su caddu e nche lu leat a domo de un'atera tzia. La mutit e li nat:
- Tzia a mi lu tentates custu caddu.
- E giai bos lu tento. Ligatelu in cussu brocu.
Pacu tempus a pustis, torrat su prade e li nat:
- Tzia so torratu po mi nche picare su caddu.
- Oddeu su pra', su pitzinnu l'at picatu e nche l'est ughitu.
- Cara tzia, mi dispiachet, ja i chi non mi torrates su caddu mi nche pico su pitzinnu.
E gai at fatu. Poi custu pitzinnu nche l'at inserratu in intro de una càssia. D onnia tantu su prade lu computait a bier s'it in-grassande, poi, cando it grassu, l'at mortu.
Est unu contu de Isopo.