| Title: | S'ORCU |
| Depositor: | Mario Sanna |
| Dialect: | Nugoresu |
| Source: | Giuseppa Jaja - Nùgoro |
| Copyright: | Mario Sanna |
| Comments: | Est interessante a notare chi sa forma " a lu traballarent" est una forma verbale antica de conzuntivu, chi petzi sos antzianos, e non totus, amentant galu e l'impreant.
Si notet peri chi "vit", in ateras situassione sonat "fit", comente in s'espressione: Chie vit(i)? - Fit issu. - Sa secunda 'i' de 'vit(i),, est sa vocale paragogica chi s'annaghet cando s'arressat su faveddu. Non b'est in " fit issu", ca custa espressione si pronuntziat comente chi siet una parugula e bia: fitissu. Si dia trascriver totus sos contos de custa antolozia sichinde sos tratos de cada bidda, fortzis nemos diat resessire a nde legher unu! |
| HTML-Version | Lucia Grimaldi |
S'ORCU
B'aiat una borta una familia chi aiat un ortu. Cada die andabant a lu traballarent. Una die sa mama at cotu sa pulenta e a pustis de si nche l'aer manicada sunt ghiraos a bidda, irmenticandesi su ramajolu.
Cando si l'ant amentau, sa mama at nau:
-Chie andat a nche lu picare?
E totus ant rispostu chi nono, ca fit denote e timiant s'orcu.
Tando a sa fine unu at nau:
- Ando deo.
Arribau, at atzapau s'orcu chi fit linghende su ramajolu. Su pitzocu l'at nau:
- Daemilu, chi mama lu cheret.
E s'orcu l'at rispostu:
- Cando l'apo lintu totu ti lu torro.
A pustis de liu aer nau medas bortas, liu at dau e su pitzocu, si nch'andat e curret ca fit una bèstia ferotze.
Custu contu, a lu cherret iscriver sicunde comente pretendent cussos chi narant chi siet su limbazu "nugoresu" e chi ateru no est che i sa trascrissione fonetica de su modu de lu faveddare, diat esser goi:
B'aiat una borta una famillia chi aiat un'ortu. Cada die andaban a llu traballarent. Una die sa mama a ccottu sa pulenta e a ppustis manicada sun ghiraos a bidda irmenticandesi su ramajolu.
Cando si l'an ammentau, sa mama a nnau: - Chie andat a che lu battire? - E tottus an rrispotu nono,ca vi ddenote e timian s'orcu. Tando a ssa vine, unu a nnau:
- Ando deo.
A s'arribada, at atzappau s'orcu chi vi llinghnde su ramajolu. Su pitzoccu l'a nnau: - Daemilu ca mama lu cheret. - E s'orcu l'a rrispostu: - Cando che l'apo lintu totu ti lu torro.
A pustis chi liu aia nnau tantas (medas) bortas li a ddau su pitzocu si cch'andat e curre cca vit una bèstia ferotze.