BISOS DE UNA PITZINNA
IN-D UNU LAMPADAS DE MARE

A s'arribada
su birde de sa flora
m'at prenadu sos ocros.
Sos pinos artos
chircabant
sa luche in chelu,
donande s'umbra
a s'umaninade
allupada de sole e de calore.
Matas de mudrecu,
lidone e chessa
s'ispinghiant a pare
a si facher locu, serrande su coladorju
a zente istranza.
Murtas e pinos
isparghiant nuscos agrestes
ammesturandelos a sas erbas
in pitu 'e diventare fenu.
Afurriada dae totu cussu birde,
s'animu si mascabat
s'imbriacabat
de nuscos bellos
chi fachiant alapinna
a m'isolare dae su mundu intregu.
Una boche mi mutiat:
fit in pessu un'alenu
de aterube, de locos innedda.
In cussu mundu de fantasia
s'isterriat s'anima in pache,
godendesi sa natura
a mesu die.
Una boche, un orulu
m'ispramat
m'ischidat dae unu bisu
bisadu a ocros apertos.
E curro a mare
e m'imbolo in s'aba
e tipilias de fritu
mi moricant sa carena;
unu mamentu, unu nudda
m'ischidant a mirare
chelu e mare
aunidos a si basare
in-d un'orizonte de recreu.
A bellu a bellu impojande
s'aba torrat a mi furare sos sentidos
annegandemi
in sos nuscos de mare
de aghera salina
e unu benticheddu lenu lenu
mi carinnat pinnica
jocandesi cun undas de pilos
cun isprumas chichina
de undas de mare
a s'andali e torra
carinnande sas arenas atas atas:
ninnant unu bisu
chi si renovat annu cun annu
mamentu pro mamentu
dae tempos anticorios
e non 'istraca mai.